ਨਵੀਂ ਦਿੱਲੀ, ਫਰਵਰੀ 3: ਅਮਰੀਕਾ ਨੇ ਭਾਰਤੀ ਉਤਪਾਦਾਂ ‘ਤੇ ਟੈਰਿਫ 18 ਪ੍ਰਤੀਸ਼ਤ ਕਰ ਦਿੱਤਾ ਹੈ, ਜਿਸ ਨਾਲ ਭਾਰਤ ਨੂੰ ਵਿਸ਼ਵ ਨਿਰਯਾਤ ਮੁਕਾਬਲੇ ਵਿੱਚ ਮਹੱਤਵਪੂਰਨ ਵਧਤ ਮਿਲ ਰਹੀ ਹੈ। ਨਵੇਂ ਟੈਰਿਫ ਢਾਂਚੇ ਅਨੁਸਾਰ, ਭਾਰਤ ਹੁਣ ਕਈ ਪ੍ਰਮੁੱਖ ਨਿਰਯਾਤਕ ਅਰਥਵਿਵਸਥਾਵਾਂ ਨਾਲੋਂ ਘੱਟ ਟੈਰਿਫ ਵਾਲੇ ਦੇਸ਼ਾਂ ਵਿੱਚ ਸ਼ਾਮਲ ਹੋ ਗਿਆ ਹੈ।
ਮੌਜੂਦਾ ਟੈਰਿਫ ਸਥਿਤੀ ਦੇ ਅਨੁਸਾਰ, ਭਾਰਤ ‘ਤੇ ਅਮਰੀਕੀ ਟੈਰਿਫ 18 ਪ੍ਰਤੀਸ਼ਤ ਰਹੇਗਾ, ਜਦਕਿ ਇੰਡੋਨੇਸ਼ੀਆ ‘ਤੇ 19 ਪ੍ਰਤੀਸ਼ਤ, ਵਿਆਤਨਾਮ ਅਤੇ ਬੰਗਲਾਦੇਸ਼ ‘ਤੇ 20 ਪ੍ਰਤੀਸ਼ਤ ਅਤੇ ਚੀਨ ‘ਤੇ 34 ਪ੍ਰਤੀਸ਼ਤ ਟੈਰਿਫ ਲਾਗੂ ਹੈ। ਇਸ ਤੁਲਨਾ ਵਿੱਚ, ਭਾਰਤ ਹੁਣ ਏਸ਼ੀਆਈ ਨਿਰਯਾਤ ਮੁਕਾਬਲਿਆਂ ਦੇ ਮੁਕਾਬਲੇ ਵਿੱਚ ਬਿਹਤਰ ਸਥਿਤੀ ਵਿੱਚ ਹੈ।
ਵ੍ਹਾਈਟ ਹਾਊਸ ਨੇ ਸੋਮਵਾਰ ਨੂੰ ਕਿਹਾ ਕਿ ਭਾਰਤ ਦੀ ਰੂਸੀ ਤੇਲ ਦੀ ਖਰੀਦ ਬੰਦ ਕਰਨ ‘ਤੇ ਸਹਿਮਤੀ ਦੇ ਤਹਿਤ, ਰੂਸੀ ਤੇਲ ਨਾਲ ਜੁੜਿਆ 25 ਪ੍ਰਤੀਸ਼ਤ ਵਾਧੂ ਟੈਰਿਫ ਪੂਰੀ ਤਰ੍ਹਾਂ ਹਟਾ ਦਿੱਤਾ ਜਾਵੇਗਾ। ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਅਤੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਵਿਚਕਾਰ ਹੋਈ ਫੋਨ ਗੱਲਬਾਤ ਦੇ ਬਾਅਦ ਇਹ ਫੈਸਲਾ ਲਿਆ ਗਿਆ।
ਵ੍ਹਾਈਟ ਹਾਊਸ ਦੇ ਇੱਕ ਅਧਿਕਾਰੀ ਨੇ ਦੱਸਿਆ, “ਭਾਰਤ ਦੁਆਰਾ ਰੂਸੀ ਤੇਲ ਦੀ ਖਰੀਦ ਖਤਮ ਕਰਨ ਦੇ ਸਮਝੌਤੇ ਦੇ ਤਹਿਤ 25 ਪ੍ਰਤੀਸ਼ਤ ਰੂਸੀ ਤੇਲ-ਸੰਬੰਧੀ ਟੈਰਿਫ ਹਟਾਇਆ ਜਾ ਰਿਹਾ ਹੈ।”
ਰਾਸ਼ਟਰਪਤੀ ਟਰੰਪ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ ‘ਟ੍ਰੂਥ ਸੋਸ਼ਲ’ ‘ਤੇ ਕਿਹਾ ਕਿ ਇਸ ਸਮਝੌਤੇ ਦੇ ਤਹਿਤ ਅਮਰੀਕੀ ਵਾਪਾਰਕ ਟੈਰਿਫ 25 ਪ੍ਰਤੀਸ਼ਤ ਤੋਂ ਘਟ ਕੇ 18 ਪ੍ਰਤੀਸ਼ਤ ਹੋ ਜਾਵੇਗਾ। ਇਸਨੂੰ ਉਹਨਾਂ ਨੇ ਊਰਜਾ ਸਹਿਯੋਗ ਅਤੇ ਭੂ-ਰਾਜਨੀਤਿਕ ਲਕਸ਼ਾਂ ਨਾਲ ਜੁੜੇ ਦੋਪੱਖੀ ਵਾਪਾਰ ਸੰਬੰਧਾਂ ਵਿੱਚ ਵੱਡਾ ਬਦਲਾਅ ਦੱਸਿਆ।
ਟਰੰਪ ਦੇ ਅਨੁਸਾਰ, ਦੋਨੋਂ ਨੇਤਾ ਵਾਪਾਰ, ਰੂਸ-ਯੂਕਰੇਨ ਯੁੱਧ ਅਤੇ ਊਰਜਾ ਸਪਲਾਈ ਸਮੇਤ ਕਈ ਮੁੱਦਿਆਂ ‘ਤੇ ਗੱਲਬਾਤ ਕੀਤੀ। ਉਨ੍ਹਾਂ ਨੇ ਦਾਅਵਾ ਕੀਤਾ ਕਿ ਪ੍ਰਧਾਨ ਮੰਤਰੀ ਮੋਦੀ ਨੇ ਰੂਸੀ ਤੇਲ ਦੀ ਖਰੀਦ ਬੰਦ ਕਰਨ ਅਤੇ ਅਮਰੀਕਾ ਤੋਂ, ਅਤੇ ਸੰਭਵਤ: ਵੇਨੇਜ਼ੂਏਲਾ ਤੋਂ ਤੇਲ ਆਯਾਤ ਵਧਾਉਣ ‘ਤੇ ਸਹਿਮਤੀ ਦਿੱਤੀ ਹੈ।
ਪ੍ਰਧਾਨ ਮੰਤਰੀ ਮੋਦੀ ਨੇ ਸੋਸ਼ਲ ਮੀਡੀਆ ਪਲੇਟਫਾਰਮ ‘ਐਕਸ’ ‘ਤੇ ਕਿਹਾ, “ਇਹ ਜਾਣ ਕੇ ਖੁਸ਼ੀ ਹੋਈ ਕਿ ‘ਮੇਡ ਇਨ ਇੰਡੀਆ’ ਉਤਪਾਦਾਂ ‘ਤੇ ਹੁਣ 18 ਪ੍ਰਤੀਸ਼ਤ ਦਾ ਘੱਟ ਟੈਰਿਫ ਲਾਗੂ ਹੋਵੇਗਾ।”
ਉਨ੍ਹਾਂ ਨੇ ਕਿਹਾ ਕਿ ਜਦੋਂ ਦੁਨੀਆ ਦੀਆਂ ਦੋ ਵੱਡੀਆਂ ਅਰਥਵਿਵਸਥਾਵਾਂ ਅਤੇ ਸਭ ਤੋਂ ਵੱਡੇ ਲੋਕਤੰਤਰ ਇੱਕਠੇ ਕੰਮ ਕਰਦੇ ਹਨ, ਤਾਂ ਇਸ ਨਾਲ ਲੋਕਾਂ ਨੂੰ ਲਾਭ ਹੁੰਦਾ ਹੈ ਅਤੇ ਸਹਿਯੋਗ ਦੇ ਨਵੇਂ ਮੌਕੇ ਖੁਲਦੇ ਹਨ।
ਸੀਨੀਅਰ ਅਮਰੀਕੀ ਅਧਿਕਾਰੀਆਂ ਦੇ ਅਨੁਸਾਰ, ਵਾਧੂ 25 ਪ੍ਰਤੀਸ਼ਤ ਟੈਰਿਫ ਸਿੱਧੇ ਤੌਰ ‘ਤੇ ਭਾਰਤ ਦੀ ਰੂਸੀ ਤੇਲ ਦੀ ਖਰੀਦ ਨਾਲ ਜੁੜਿਆ ਸੀ, ਜਿਸਨੂੰ ਹੁਣ ਨਵੀਂ ਦਿੱਲੀ ਦੀ ਵਚਨਬੱਧਤਾ ਦੇ ਬਾਅਦ ਹਟਾ ਦਿੱਤਾ ਗਿਆ ਹੈ। ਇਹ ਫੈਸਲਾ ਵਾਪਾਰ ਨੀਤੀ ਨੂੰ ਊਰਜਾ ਅਤੇ ਭੂ-ਰਾਜਨੀਤਿਕ ਉਦੇਸ਼ਾਂ ਨਾਲ ਜੋੜਨ ਦੀ ਅਮਰੀਕੀ ਰਣਨੀਤੀ ਨੂੰ ਦਰਸਾਉਂਦਾ ਹੈ।
–
ਡੀਐਸਸੀ
