ਨਵੀਂ ਦਿੱਲੀ, ਮਾਰਚ 25: ਦਿਗਗਜ ਫੁੱਟਬਾਲਰ ਮੋਹੰਮਦ ਸਲਾਹ ਨੇ ਲਿਵਰਪੂਲ ਐਫਸੀ ਨੂੰ ਛੱਡਣ ਦੀ ਘੋਸ਼ਣਾ ਕੀਤੀ ਹੈ। ਇਸ ਸੀਜ਼ਨ ਦੇ ਅੰਤ ‘ਤੇ ਉਨ੍ਹਾਂ ਦਾ ਲਿਵਰਪੂਲ ਨਾਲ ਠੇਕਾ ਖਤਮ ਹੋ ਜਾਵੇਗਾ। ਉਨ੍ਹਾਂ ਦੇ ਠੇਕੇ ਦਾ ਨਵੀਨੀਕਰਨ ਨਹੀਂ ਹੋਵੇਗਾ। ਇਹ ਜਾਣਕਾਰੀ ਉਨ੍ਹਾਂ ਦੇ ਨਾਲ ਨਾਲ ਕਲੱਬ ਨੇ ਵੀ ਦਿੱਤੀ ਹੈ।
ਮੋਹੰਮਦ ਸਲਾਹ ਨੇ ਸੋਸ਼ਲ ਮੀਡੀਆ ਰਾਹੀਂ ਇਹ ਜਾਣਕਾਰੀ ਦਿੱਤੀ। ਆਪਣੇ ਭਾਵੁਕ ਵੀਡੀਓ ਸੰਦੇਸ਼ ਵਿੱਚ ਉਨ੍ਹਾਂ ਕਿਹਾ ਕਿ ਉਹ ਚਾਹੁੰਦੇ ਸਨ ਕਿ ਉਨ੍ਹਾਂ ਦੇ ਸਮਰਥਕ ਇਹ ਖ਼ਬਰ ਸਿੱਧਾ ਉਨ੍ਹਾਂ ਤੋਂ ਸੁਣਨ। ਉਨ੍ਹਾਂ ਨੇ ਇਸਨੂੰ ਆਪਣੇ ‘ਫੇਅਰਵੈਲ ਦਾ ਪਹਿਲਾ ਹਿੱਸਾ’ ਦੱਸਿਆ, ਜੋ ਦਰਸਾਉਂਦਾ ਹੈ ਕਿ ਆਉਣ ਵਾਲੇ ਸਮੇਂ ਵਿੱਚ ਹੋਰ ਵੀ ਵਿਦਾਈ ਸੰਦੇਸ਼ ਸਾਹਮਣੇ ਆ ਸਕਦੇ ਹਨ।
33 ਸਾਲ ਦੇ ਸਲਾਹ 2017 ਵਿੱਚ ਐੱਸਐੱਸ ਰੋਮਾ ਤੋਂ ਲਗਭਗ 50 ਮਿਲੀਅਨ ਡਾਲਰ ‘ਚ ਲਿਵਰਪੂਲ ਆਏ ਸਨ। ਉਨ੍ਹਾਂ ਨੇ 435 ਮੈਚਾਂ ਵਿੱਚ 255 ਗੋਲ ਕੀਤੇ, ਜਿਸ ਨਾਲ ਉਹ ਕਲੱਬ ਦੇ ਆਲ-ਟਾਈਮ ਟਾਪ ਸਕੋਰਰਾਂ ਵਿੱਚ ਤੀਜੇ ਸਥਾਨ ‘ਤੇ ਪਹੁੰਚ ਗਏ। ਸਲਾਹ ਨੇ ਆਪਣੇ ਨਾਮ ਨੂੰ ਕਲੱਬ ਦੇ ਮਹਾਨ ਖਿਡਾਰੀਆਂ ਵਿੱਚ ਦਰਜ ਕਰਵਾ ਲਿਆ ਹੈ।
ਲਿਵਰਪੂਲ ਵਿੱਚ ਆਪਣੇ ਨੌਂ ਸਾਲ ਦੇ ਕਰੀਅਰ ਦੌਰਾਨ, ਸਲਾਹ ਨੇ ਟੀਮ ਨੂੰ ਕਈ ਇਤਿਹਾਸਕ ਸਫਲਤਾਵਾਂ ਦਿਲਵਾਈਆਂ। ਕਲੱਬ ਦੀ ਪ੍ਰੀਮੀਅਰ ਲੀਗ, ਯੂਈਐਫਏ ਚੈਂਪੀਅਨਜ਼ ਲੀਗ, ਐਫਏ ਕਪ, ਲੀਗ ਕਪ, ਕਲੱਬ ਵਰਲਡ ਕਪ ਅਤੇ ਯੂਈਐਫਏ ਸੁਪਰ ਕਪ ਵਰਗੀਆਂ ਵੱਡੀਆਂ ਖਿਤਾਬੀ ਜਿੱਤਾਂ ਵਿੱਚ ਸਲਾਹ ਦਾ ਅਹਿਮ ਯੋਗਦਾਨ ਰਿਹਾ।
ਵਿਅਕਤੀਗਤ ਉਪਲਬਧੀਆਂ ਦੀ ਗੱਲ ਕਰੀਏ ਤਾਂ ਸਲਾਹ ਨੇ ਚਾਰ ਵਾਰ ਪ੍ਰੀਮੀਅਰ ਲੀਗ ਗੋਲਡਨ ਬੂਟ ਜਿੱਤਿਆ, ਜਿਸ ਨਾਲ ਉਨ੍ਹਾਂ ਨੇ ਥੀਅਰੀ ਹੇਨਰੀ ਦੇ ਰਿਕਾਰਡ ਦੀ ਬਰਾਬਰੀ ਕੀਤੀ। 2017-18 ਦਾ ਉਨ੍ਹਾਂ ਦਾ ਪਹਿਲਾ ਸੀਜ਼ਨ, ਜਿਸ ਵਿੱਚ ਉਨ੍ਹਾਂ ਨੇ 44 ਗੋਲ ਕੀਤੇ, ਅੱਜ ਵੀ ਪ੍ਰੀਮੀਅਰ ਲੀਗ ਇਤਿਹਾਸ ਦੇ ਸਭ ਤੋਂ ਸ਼ਾਨਦਾਰ ਵਿਅਕਤੀਗਤ ਪ੍ਰਦਰਸ਼ਨਾਂ ਵਿੱਚ ਗਿਣਿਆ ਜਾਂਦਾ ਹੈ।
ਆਪਣੇ ਵਿਦਾਈ ਸੰਦੇਸ਼ ਵਿੱਚ ਸਲਾਹ ਨੇ ਕਲੱਬ, ਸ਼ਹਿਰ ਅਤੇ ਫੈਨਜ਼ ਦੇ ਪ੍ਰਤੀ ਗਹਿਰੀਆਂ ਭਾਵਨਾਵਾਂ ਦਾ ਪ੍ਰਗਟਾਵਾ ਕੀਤਾ। ਉਨ੍ਹਾਂ ਕਿਹਾ ਕਿ ਲਿਵਰਪੂਲ ਉਨ੍ਹਾਂ ਲਈ ਸਿਰਫ ਇੱਕ ਕਲੱਬ ਨਹੀਂ, ਬਲਕਿ ਇੱਕ ਭਾਵਨਾ, ਇਤਿਹਾਸ ਅਤੇ ਆਤਮਾ ਹੈ। ਉਨ੍ਹਾਂ ਨੇ ਉਹ ਪਲ ਯਾਦ ਕੀਤੇ ਜਦੋਂ ਟੀਮ ਨੇ ਜਿੱਤ ਦਾ ਜਸ਼ਨ ਮਨਾਇਆ ਅਤੇ ਮੁਸ਼ਕਲ ਸਮੇਂ ਵਿੱਚ ਸਾਥ ਦਿੱਤਾ।
ਸਲਾਹ ਦਾ ਅਲੱਗ ਹੋਣਾ ਲਿਵਰਪੂਲ ਲਈ ਇੱਕ ਵੱਡਾ ਝਟਕਾ ਹੈ।
–
ਪੀਏਕੇ