ਭੁਵਨੇਸ਼ਵਰ, ਅਪ੍ਰੈਲ 20: ਓਡੀਸ਼ਾ ਦੇ ਮੁੱਖ ਮੰਤਰੀ ਮੋਹਨ ਚਰਣ ਮਾਝੀ ਅਤੇ ਕੇਂਦਰੀ ਮੰਤਰੀ ਅਸ਼ਵਿਨੀ ਵੈਸ਼ਨਵ ਨੇ ਭੁਵਨੇਸ਼ਵਰ ਦੇ ਇਨਫੋਵੈਲੀ ਵਿੱਚ 3ਡੀ ਗਲਾਸ ਸਾਲੂਸ਼ਨਜ਼ ਦੁਆਰਾ ਭਾਰਤ ਦੀ ਪਹਿਲੀ ਐਡਵਾਂਸਡ 3ਡੀ ਗਲਾਸ ਸਬਸਟ੍ਰੇਟ ਪੈਕਜਿੰਗ ਯੂਨਿਟ ਦੇ ਸ਼ਿਲਾਨਿਆਸ ਸਮਾਰੋਹ ਵਿੱਚ ਸ਼ਾਮਲ ਹੋਏ।
ਸਮਾਰੋਹ ਵਿੱਚ ਬੋਲਦੇ ਹੋਏ, ਸੀਐਮ ਮਾਝੀ ਨੇ ਕਿਹਾ ਕਿ ਓਡੀਸ਼ਾ ਦੇ ਕੋਲ ਸਰੋਤ, ਪ੍ਰਤਿਭਾ, ਬੁਨਿਆਦੀ ਢਾਂਚਾ ਅਤੇ ਮਜ਼ਬੂਤ ਇਰਾਦਾ ਹੈ, ਜਿਸ ਕਰਕੇ ਇਹ ਗਲੋਬਲ ਸੈਮੀਕੰਡਕਟਰ ਉਦਯੋਗ ਲਈ ਇੱਕ ਆਦਰਸ਼ ਸਥਾਨ ਬਣ ਗਿਆ ਹੈ। ਇਸ ਸਮਾਰੋਹ ਵਿੱਚ ਓਡੀਸ਼ਾ ਦੇ ਇਲੈਕਟ੍ਰਾਨਿਕਸ ਅਤੇ ਆਈਟੀ ਮੰਤਰੀ ਡਾ. ਮੁਕੇਸ਼ ਮਹਾਲਿੰਗ ਵੀ ਮੌਜੂਦ ਸਨ।
ਇਸ ਪ੍ਰੋਜੈਕਟ ਵਿੱਚ ਲਗਭਗ 2,000 ਕਰੋੜ ਰੁਪਏ ਦਾ ਨਿਵੇਸ਼ ਕੀਤਾ ਜਾ ਰਿਹਾ ਹੈ, ਜਿਸ ਨਾਲ ਹਰ ਸਾਲ 70,000 ਗਲਾਸ ਪੈਨਲ, 50 ਮਿਲੀਅਨ ਅਸੈਂਬਲਡ ਯੂਨਿਟ ਅਤੇ 13,200 ਐਡਵਾਂਸਡ 3DHI ਮੋਡਿਊਲ ਦਾ ਉਤਪਾਦਨ ਹੋਵੇਗਾ। ਇਸ ਪ੍ਰੋਜੈਕਟ ਨਾਲ ਰਾਜ ਵਿੱਚ ਲਗਭਗ 2,500 ਨੌਕਰੀਆਂ ਦੇ ਮੌਕੇ ਬਣਨ ਦੀ ਉਮੀਦ ਹੈ।
ਮੁੱਖ ਮੰਤਰੀ ਨੇ ਕਿਹਾ ਕਿ ਇਹ ਦਿਨ ਨਾ ਸਿਰਫ ਓਡੀਸ਼ਾ ਲਈ, ਸਗੋਂ ਭਾਰਤ ਦੇ ਤਕਨੀਕੀ ਨੇਤ੍ਰਿਤਵ ਲਈ ਵੀ ਇੱਕ ਮਹੱਤਵਪੂਰਨ ਪੜਾਅ ਹੈ। ਉਨ੍ਹਾਂ ਦੱਸਿਆ ਕਿ ਇਹ ਪ੍ਰੋਜੈਕਟ ਦੇਸ਼ ਦੀ ਪਹਿਲੀ ਐਡਵਾਂਸਡ 3D ਗਲਾਸ ਸਬਸਟ੍ਰੇਟ ਪੈਕਜਿੰਗ ਯੂਨਿਟ ਹੋਵੇਗੀ। ਇੱਥੇ ਬਣਨ ਵਾਲੇ ਉਤਪਾਦ ਆਰਟੀਫੀਸ਼ੀਅਲ ਇੰਟੈਲੀਜੈਂਸ, ਹਾਈ-ਪਰਫਾਰਮੈਂਸ ਕੰਪਿਊਟਿੰਗ ਅਤੇ ਰੱਖਿਆ ਇਲੈਕਟ੍ਰਾਨਿਕਸ ਵਰਗੇ ਖੇਤਰਾਂ ਵਿੱਚ ਮਹੱਤਵਪੂਰਨ ਭੂਮਿਕਾ ਨਿਭਾਉਣਗੇ।
ਉਨ੍ਹਾਂ ਕਿਹਾ, “ਓਡੀਸ਼ਾ ਗਲੋਬਲ ਸੈਮੀਕੰਡਕਟਰ ਉਦਯੋਗ ਲਈ ਇੱਕ ਬਿਹਤਰ ਸਥਾਨ ਬਣ ਗਿਆ ਹੈ। ਸਾਡੇ ਕੋਲ ਸਰੋਤ, ਪ੍ਰਤਿਭਾ, ਬੁਨਿਆਦੀ ਢਾਂਚਾ ਅਤੇ ਮਜ਼ਬੂਤ ਇਰਾਦਾ ਹੈ। ਜੇ ਤੁਸੀਂ ਭਵਿੱਖ ਦੀ ਤਕਨੀਕ ਬਣਾਉਣਾ ਚਾਹੁੰਦੇ ਹੋ, ਤਾਂ ਓਡੀਸ਼ਾ ਤੁਹਾਡੇ ਲਈ ਸਹੀ ਸਥਾਨ ਹੈ।”
ਮੁੱਖ ਮੰਤਰੀ ਨੇ ਨਿਵੇਸ਼ ਲਈ ਓਡੀਸ਼ਾ ਦੇ ਪਸੰਦਗੀ ਸਥਾਨ ਬਣਨ ਦੇ ਕਾਰਨਾਂ ਵਿੱਚ ਪੰਜ ਮੁੱਖ ਗੱਲਾਂ ਦਾ ਜ਼ਿਕਰ ਕੀਤਾ: ਪ੍ਰਚੁਰ ਕੁਦਰਤੀ ਸਰੋਤ, ਵਿਸ਼ਵ-ਪੱਧਰੀ ਢਾਂਚਾ, ਕੁਸ਼ਲ ਯੁਵਕ ਸ਼ਕਤੀ, ਬਿਹਤਰ ਕਨੈਕਟਿਵਿਟੀ ਅਤੇ ਜਵਾਬਦੇਹ ਪ੍ਰਸ਼ਾਸਨ।
ਉਨ੍ਹਾਂ ਯੁਵਾਂ ਨੂੰ ਅਪੀਲ ਕੀਤੀ ਕਿ “ਇਹ ਓਡੀਸ਼ਾ ਦੇ ਵਿਦਿਆਰਥੀਆਂ ਅਤੇ ਇੰਜੀਨੀਅਰਾਂ ਲਈ ਸੁਨਹਿਰਾ ਮੌਕਾ ਹੈ। ਉਨ੍ਹਾਂ ਨੂੰ ਇਸ ਉਭਰਦੇ ਖੇਤਰ ਵਿੱਚ ਅੱਗੇ ਵਧਣ ਲਈ ਲੋੜੀਂਦੇ ਹੁਨਰ ਸਿੱਖਣੇ ਚਾਹੀਦੇ ਹਨ।”
ਮੁੱਖ ਮੰਤਰੀ ਨੇ ਦੱਸਿਆ ਕਿ ਰਾਜ ਵਿੱਚ ਸੈਮੀਕੰਡਕਟਰ ਖੇਤਰ ਵਿੱਚ 10,000 ਕਰੋੜ ਰੁਪਏ ਤੋਂ ਵੱਧ ਦਾ ਨਿਵੇਸ਼ ਹੋ ਚੁੱਕਾ ਹੈ। RIR ਪਾਵਰ ਇਲੈਕਟ੍ਰਾਨਿਕਸ ਅਤੇ ਸਿਕਸਸੇਮ ਵਰਗੀਆਂ ਕੰਪਨੀਆਂ ਪਹਿਲਾਂ ਹੀ ਇੱਥੇ ਆਪਣੀਆਂ ਯੂਨਿਟਾਂ ਲਗਾ ਚੁੱਕੀਆਂ ਹਨ।
ਉਨ੍ਹਾਂ ਕਿਹਾ ਕਿ ਪ੍ਰਧਾਨ ਮੰਤਰੀ ਮੋਦੀ ਦੇ ‘ਆਤਮਨਿਰਭਰ ਭਾਰਤ’ ਦੇ ਵਿਜ਼ਨ ਨੂੰ ਪੂਰਾ ਕਰਨ ਵਿੱਚ ਓਡੀਸ਼ਾ ਮਹੱਤਵਪੂਰਨ ਭੂਮਿਕਾ ਨਿਭਾਏਗਾ ਅਤੇ ਪੂਰਬੀ ਭਾਰਤ ਲਈ ਇੱਕ ਲਾਂਚਪੈਡ ਬਣੇਗਾ।
ਕੇਂਦਰੀ ਮੰਤਰੀ ਅਸ਼ਵਿਨੀ ਵੈਸ਼ਨਵ ਨੇ ਕਿਹਾ ਕਿ ਓਡੀਸ਼ਾ ਨੂੰ ਉਦਯੋਗਕ ਰੂਪ ਵਿੱਚ ਮਜ਼ਬੂਤ ਬਣਾਉਣ ਅਤੇ ਆਉਣ ਵਾਲੇ ਸਾਲਾਂ ਵਿੱਚ ਆਈਟੀ ਹੱਬ ਵਜੋਂ ਵਿਕਸਤ ਕਰਨ ਦੇ ਯਤਨ ਜਾਰੀ ਰਹਿਣਗੇ। ਉਨ੍ਹਾਂ ਕਿਹਾ ਕਿ ਦੁਨੀਆ ਦੀ ਸਭ ਤੋਂ ਉਨਨਤ ਸੈਮੀਕੰਡਕਟਰ ਤਕਨੀਕ ਹੁਣ ਓਡੀਸ਼ਾ ਵਿੱਚ ਪਹੁੰਚ ਗਈ ਹੈ। ਅੱਜ ਦਾ ਸ਼ਿਲਾਨਿਆਸ ਰਾਜ ਵਿੱਚ ਵਿਆਪਕ ਵਿਕਾਸ ਲਿਆਏਗਾ। 3D ਗਲਾਸ ਸਾਲੂਸ਼ਨਜ਼ ਦੀ ਇਹ ਯੂਨਿਟ ਦੇਸ਼ ਵਿੱਚ ਆਪਣੀ ਕਿਸਮ ਦਾ ਪਹਿਲਾ ਉਤਪਾਦ ਬਣਾਏਗੀ ਅਤੇ ਇਹ ਤਕਨੀਕ ਭਵਿੱਖ ਵਿੱਚ ਸੈਮੀਕੰਡਕਟਰ ਉਦਯੋਗ ਦੀ ਦਿਸ਼ਾ ਨਿਰਧਾਰਿਤ ਕਰੇਗੀ।